بالصور طريقة عمل فتة العدس بالثوم و الخل الاصلية من مطبخ همسه احمد
احيانا بزهق من اللحمة و الفراخ و بتكون فتة العدس بالخل و الثوم اول حاجه تخطر علي بالي علشان اغير شويه في الاكل
ايه رايكم نشوف مع بعض طريقة عمل فتة العدس بالخل و الثوم اللي بستفيد فيها من بقايا العيش البلدي عندي بدل من رميه ....
المقادير
نصف كيلو عدس
3 طماطم
2 جزر
بصلة كبيرة
ثوم مفروم بالملح و الكمون و الشطة و الفلفل الرومي
و 2 رغيف بلدي كانوا مكسرين عندي
سمنه او زبدة
خل
الطريقة و بالصور بقي من مطبخ همسه لعيونكم
اغسلي العدس كويس لحد ما تلاقي ماء الغسيل بتاعته بيضاء و بغطيه بالماء و ارفعيه عالنار
قطعي البصل و الجزر و الطماطم و ضيفيهم للعدس
و دا الثوم المفروم عندي علي طول في الفريزر بالشكل ده بستعمل منه لكل الاكل بسهوله
بكون فرمته مع كمون و شطة و ملح و فلفل رومي
حاخد منه معلقه تقريبا و احط عالعدس
و اتركه يغلي على نار هادئة لحد ما يستوي
قطعي العيش و دخليه الفرن لدقائف يتحمص شويه حسب رغبتك
بعد ما العدس يبرد شويه ضربته في الخلاط
وضفته على العيش بتاعي
شوحي الثوم في معلقه سمنه لحد ما يبقي لونه ذهبي تقريبا و اطش عليها الخل
و ادي الطشه ضفتها لفته العدس طشششششششششششششش ... يمي يمي عالريحة رااااائعة و الله
و اتفضلوا دوقوا الفتة اللذيذة مع محمد ابني
و بالف هنا و شفا علي قلوبكم يارب
و ان شاء الله ارفع لكم الوصفة قريب عاليوتيوب في قناتي
هنا
او هنا
ووصفات شهية مصورة بالصوت و الصورة من مطبخ همسه
مع حبي و تحياتي
همسه احمد
ربنا يخليكى لزوجك واولادك بحب اكلك اقوى لانة شعبى وهو دة اكلنا مش كل الشيف يتلفظ بكلمات واشياء والله لو طلعت القمر مااعرف اجيبهم بيشعرونى اننى من عالم اخر غير عالم الدنيا يعطيكى العافية
ردحذف